Уяв - кашни шкул валли

«Движение ЭКА» регионсем хушшинче обществăлла организаци шкулти экологи уявĕн «Школьный Экодвор» конкурсне хутшăнма йыхравлать. Конкурса кашни шкул хутшăнма пултарать. Тунă ĕçсем çинчен хатĕрленĕ отчета 2023 çулхи майăн 31-мĕшĕччен ярса памалла та, мала тухса хаклă приз çĕнсе илмелле.

«Школьный Экодвор» уяв ачасемпе вĕсен ашшĕ-амăшне çỹп-çапа уйрăмшарăн пайласа пуçтарма, экологи проблемисене пĕр-пĕринпе хутшăнса тата вăйăсем урлă татса пама пулăшĕ. Кивĕ хут, пластик савăт-сапа тата ытти чĕр тавар пуçтарасси хаваслă вăйă евĕр пулса пытăр, çавăн пекех шкулта выставкăсемпе мастер-классем, савăнăçлă мероприятисем ирттерме сĕнеççĕ.

Конкурса хутшăнас тесен, школьный.экодвор.рф сайтра регистрацилемелле, уяв ирттернĕ хыççăн #школьныйэкодвор2023 хештегпа социаллă сетьре хăвăрăн ĕçĕре пичетлемелле.