Иртнĕ эрнере Шăмăршă районĕн больницине коронавируса асăрхаттарма пулăшакан вакцинăн пĕрремĕш партийĕ килсе çитрĕ.

Больницăн тĕп врачĕ Ирина Смирнова районта вакцинаци пуçланнине пĕлтерчĕ:

"Шăмăршă район тĕп больницине 110 доза "Гам-КОВИД-ВАК" ("Спутник V") вакцинăн пĕрремĕш партийĕ килнĕ. Паянхи кун малтанхи 110 çынна прививка турăмăр, вĕсен шутĕнче _ 10 врач".

Специалистсем ку таранччен ковидпа чирлеменнисене тăхтаса тăмасăр прививка тума сĕнеççĕ. Чирлесе ирттернĕ хыççăн та, организмра ют бактерисемпе вируссене хирĕç кĕрешме пултаракан молекулăсен (антитела теççĕ) шайĕ пĕчĕккисене, уйрăмах çын сахăр диабечĕпе е кĕлетке самăррипе е урăх чирпе аптăрать пулсан, врачсем прививка тума калаççĕ.

Ирина Анатольевна ăнлантарнă тăрăх, вакцинаци икĕ тапхăртан тăрать. Иккĕмĕш тапхăр пĕрремĕшĕ хыççăн 21-мĕш кунра пулса иртмелле.

Шăмăршă районĕнче пурăнакан прививка тăвас кăмăллă çынсен патшалăх услугисен пĕрлехи порталĕ урлă çырăнма май пур. Кунсăр пуçне вакцинаци ыйтăвĕпе терапевтпа çыхăнма е больницăн регистратурине шăнкăравламалла (тел. 2-32-84). Республикăри пĕрлехи меслетпе усă курма пулать, унăн номерĕ _ 122.

Вакцинаци пуçланчĕ пулин те, обществăлла вырăнсенче маска тăхăнмалла, ытти йĕркене те пăхăнмалла.

Пĕр вăхăт республикăра лару-тăру лăпкăрах пулнăччĕ, халĕ коронавируспа чирлекенсен шучĕ ỹсни палăрать. Районти цифрăсем те çакнах çирĕплетеççĕ. Январĕн 21-мĕшĕ тĕлне районта 45 çын чирлени паллă, вĕсенчен 24-шĕ сывалнă, 1 çын вилнĕ, 20-шĕ больницăсенче, ыттисем килте сипленеççĕ.