Асăрхануллă пулăр
Воспитани ыйтăвĕсемпе районта профилактика системинчи организацисем ĕçлеççĕ, вĕсене ертсе пыраканĕ – район администрацийĕ çумĕнчи çул çитмен çамрăксемпе тата ачасемпе ĕçлекен комисси шутланать.
Кăçалхи çур çул хушшинче кунта, ашшĕ-амăшĕ асăрхануллă пулманнипе, ачасем кирлĕ кирлĕ мар эмел ĕçсе аптрани çинчен пĕлтерекен 5 материал килнĕ. Вĕсенчен 1 ача пыра сапмалли «Септолетепа», 2 ача выльăх-чĕрлĕхе паракан «Альбен» эмелпе, 2 ача марганцовкăпа наркăмăшланнă. Ку кăтарту пирĕн районшăн питĕ пăшăрхануллă. 2012 çулăн çур çулĕнче кун пек материал пĕрре çеç пулнă. Пĕчĕк ачасем эмелсене ĕçме юраманнине тавçăрсах илеймеççĕ тата хăш-пĕр им-çам хитре те илĕртÿллĕ курăнать, канихвет тесе калăн. Çавăнпа та эмелсемпе питĕ асăрхануллă пулмалла, çак йĕркене асра тытмалла:
– эмеле ĕçсен хуппине лайăх хупăр;
– им-çама ачасем курман вырăнта упрăр;
– эмел ĕçме юратман ачана «канихвет е витамин» тесе улталаса ĕçме ан хăнăхтарăр.
Çакна асра тытни кашни атте-аннешĕн усăллă.
С.ЧЕГАЕВА,
çул çитмен çамрăксемпе тата ачасемпе ĕçлекен комиссин секретарĕ.