Владимир Иванович СКВОРЦОВ (14.08.1951, Патирек). "Искра" ял хуçалăхĕпе производство кооперативĕн тракторисчĕ, ĕçре малта пыракан опытлă механизатор. 2003 çулта ăна "Чăваш Республикин тава тивĕçлĕ механизаторĕ" хисеплĕ ят парса чыс тунă.

Михаил Иванович СКВОРЦОВ (22.11.1937, Патирек). 1953 çулта "Искра" колхозра уй-хир бригадинче ĕçлеме пуçланă, 1961 çултанпа – тракторист, вăтăр ултă çул руль умĕнче пулнă. Тивĕçлĕ канăва тухсан юсав мастерскойĕнче тăрăшнă. 1984 çулта "Чăваш АССР тава тивĕçлĕ наставникĕ" хисеплĕ ята тивĕçнĕ.

Валерий Николаевич СМАЕВ (июль, 1953, Васан). 1973 çулта комсомол путевкипе Шупашкарти промышленность тракторĕсен заводне тунă çĕре хутшăннă, 1974 çулта Шупашкарти чукун çул вокзалĕнче юсавпа строительство участокĕн мастерĕ пулса ĕçлеме тытăннă, начальникĕ таран ÿснĕ. 2008 çултанпа – хăй тĕллĕн ĕçлекен предприниматель. 2000 çулта "Чăваш Республикин транспортăн тава тивĕçлĕ ĕçченĕ" ят панă.

Николай Иванович СОЛДАТЕНКОВ (1.11.1927, Улмаллă). Хĕрĕх çула яхăн "Волга" колхозра комплекслă бригада бригадирĕ пулса ĕçленĕ. 1981 çулта "Чăваш АССР ял хуçалăхĕн тава тивĕçлĕ ĕçченĕ" хисеплĕ ят парса чысланă.

Валентин Николаевич СУДУКОВ (25.02.1957, Асанкасси). Тракторист-машинист удостоверенине илнĕренпех трактор рулĕ умĕнче. Хуçалăхри малта пыракан, опытлă механизаторсенчен пĕри. 2005 çулта "Нива" акционерсен хупă обществин трактористне "Чăваш Республикин тава тивĕçлĕ механизаторĕ" ят панă.

Рафаэл Абдуллович ТАРАМАСОВ (2.07.1938, Палтиел). "Мир", "Ленинская искра" колхозсенче уй-хир бригадинче вăй хунă. 1983 çулта ăна "Чăваш АССР ял хуçалăхĕн тава тивĕçлĕ ĕçченĕ" хисеплĕ ят парса чыс тунă.

Любовь Александровна ТЕНИШЕВА (23.03.1943, Карапай Шăмăршă). Хăйĕн пурнăçне выльăх-чĕрлĕх отраслĕпе çыхăнтарнă, Киров ячĕпе хисепленекен колхозра пăрусем пăхнă çĕрте тăрăшнă. Ферма ĕçченне 1982 çулта "Чăваш АССР ял хуçалăхĕн тава тивĕçлĕ ĕçченĕ" ят панă.

Николай Васильевич ТИМОФЕЕВ (11.10.1955, Пуянкасси). Комбайнер та, гараж заведующийĕ те пулнă. Нумай çул "Правда" колхозра трактористра ĕçленĕ, халĕ «Колос» Агрофирма» сахал яваплă обществăра вăй хурать. 2007 çулта "Чăваш Республикин тава тивĕçлĕ механизаторĕ" ят панă.

Нина Федоровна ТИМОФЕЕВА (8.08.1927, Пуянкасси). Мĕн тивĕçлĕ канăва тухичченех "Правда" колхозăн пĕрремĕш комплекслă бригадинче ĕçленĕ. 1982 çулта ăна "Чăваш АССР ял хуçалăхĕн тава тивĕçлĕ ĕçченĕ" ят панă.

Ольга Ивановна ТИМОФЕЕВА (1931, Кахăрлă Шăхаль). Ĕмĕрĕпех тăван "Правда" колхозра уй-хир бригадинче ĕçленĕ. Хастар ĕçшĕн ăна 1983 çулта "Чăваш АССР ял хуçалăхĕн тава тивĕçлĕ ĕçченĕ" хисеплĕ ят парса чысланă.

Владимир Илларионович ТОКМАКОВ (12.08.1950, Патирек). "Искра" колхозри трактор бригадин бригадирне тăрăшулăхпа хастарлăхшăн, ĕçе пĕлсе те тĕплĕ йĕркелесе пынăшăн 2002 çулта "Чăваш Республикин тава тивĕçлĕ механизаторĕ" ят панă.

Нисах Келямович ТУХВЕТУЛЛИН (28.10.1935, Палтиел). 1959-1961 çулсенче – "Искра" колхоз зоотехникĕ, 1961 çултанпа – ял хуçалăх управленийĕн тĕп зоотехникĕ. Районсем пĕрлешсе пысăклансан – Патăрьелĕнчи выльăх-чĕрлĕх ăратлăхĕпе ĕçлекен станцин Шăмăршă тăрăхĕнчи зоотехникĕ. 1965-1977 çулсенче – районти ял хуçалăх управленийĕн тĕп зоотехникĕ. 1977-1988 çулсенче – "Ленинская искра" колхозăн тĕп зоотехникĕ, пĕр хушă – экономист. 1983 çулта "Чăваш АССР тава тивĕçлĕ зоотехникĕ" ят панă.