ЙЫШЛĂ выльăх-чĕрлĕх усракансем ялсенче çеç мар, район центрĕнче те пур. Вĕсенчен пĕри _ Б.Силюков. _ Хама фермер тесе те, предприниматель тесе те шутламастăп. Эп _ ахаль хресчен, - терĕ вăл. _ Выльăхсене вара мĕн ачаранах юрататăп. Килти хушма хуçалăха аталантарас шухăш Борис Сергеевичăн пуçне виçĕ çул каялла пырса кĕнĕ. Патшалăхран çăмăллăхлă ссуда илнĕ те, çамрăк выльăхсем туяннă. _ Пурнăç хистерĕ, - пытармасть кил хуçи. _ Ĕç тупăнмарĕ. Çыннăн вара мĕнле-тĕр пурăнмалла вĕт. Пĕр янă тымар вăй илсех пырать. Малтанласа темиçе пуç выльăхран пуçланнă ĕç аталансах пынă, хуçалăхра пĕчĕк ферма йĕркеленнĕ: мăйракаллă шултра выльăхсем те, сыснасем те йышлă усрама тытăннă Б.Силюков. Халĕ те пушă мар унăн витисем. Паянхи кун Борис Сергеевич 12 сысна усрать. Вĕсенчен вуннăшĕ - çăвăрлаканнисем, пысăк шурă ăратлисем. Кăçал кăна вăл çитмĕле яхăн çура илнĕ, вĕсене ăнăçлă вырнаçтарма май килнĕ. _ Ĕне выльăхсенчен хальлĕхе пĕр вăкăр кăна юлчĕ-ха, - тет кил хуçи. _ Пĕччен пурăннăран сăвакан ĕне тытма йывăртарах. Кайăк-кĕшĕк те йышлă усрать Б.Силюков: 12 хур, 50 чăх ун картишĕнче. Кунсăр пуçне унăн хăйĕн утарĕ, унта _ 35 вĕлле. Кăçал утарçă 15 фляга _ 750 килограмм пыл илнĕ. Çак пыла сутса тунă укçапа вăл çитес вăхăтрах тата тăватă-пилĕк ăратлă пăру туянасшăн, ку тĕлĕшпе Шупашкар районĕнчи пĕр хуçалăхпа калаçса татăлнă та ĕнтĕ. Выльăх усрасан, продукци те пулать. Борис Сергеевич кăçал виçĕ вăкăрпа 10 сысна самăртса пуснă, пĕр тонна ытла аш-какай сутнă. _ Йышлă выльăх усрама апачĕ те сахал мар кирлĕ вĕт? - ыйтатăп унран. Борис Сергеевич каланă тăрăх, ку тĕлĕшпе пысăк йывăрлăхсем çук. Хирте икĕ гектар çĕр пур, унта нумай çул ỹсекен курăксене çитĕнтерет. Кăçал та вĕсене икĕ хутчен çулса илнĕ, çителĕклĕ таран утă хатĕрлесе хăварнă. Комбикормпа фуража вара укçалла туянма тивет. Туса илнĕ продукци хăйĕн тăкакĕсене саплаштарать-и-ха? Çын кĕсйинчи укçана шутлама хушман та, Борис Сергеевич каланă тăрăх, выльăх-чĕрлĕх усраса самаях пайта курма пулать. Ỹркенмелле çеç мар.