ХАЛĂХА çăмăллăхлă кредит парса пулăшнин усси пурах çав: ялта пурăнакансем хăйсен хушма хуçалăхĕсене май килнĕ таран аталантарма тăрăшаççĕ. Акă, Пуянкассинчи Калашниковсенех илер-ха. Çемье картиш тулли выльăх-чĕрлĕх усрать. Ỹркенмесен, тăрăшсан, тенкĕ çумне тенкĕ те хутшăнсах пырать. Кăçал кăна, сăмахран, районти ялсенче пурăнакан 660 çемье килти хушма хуçалăха аталантарма патшалăхран 108 миллион тенкĕ ытла (планпа _ 80 миллион тенкĕ) кредит илнĕ. Ку тĕлĕшпе карапайшăмăршăсене уйрăммăн палăртса хăвармалла: ял поселенийĕнчи 72 çемье пурĕ 12762 пин тенкĕ кредит илнĕ. Палтиел ял поселенийĕнче пурăнакан 84 çемье те çак майпах килти хушма хуçалăха аталантарма кăмăл тунă. Чи пысăк кăтарту вара _ Шăмăршă ял поселенийĕнче: 271 çемье 41 миллион ытла тенкĕ кредит илме шут тытнă. Хушма хуçалăха аталантарма патшалăхран кредит илекенсем Васан, Анат Чаткас, Пуянкасси тата Кивĕ Чукал ял поселенийĕсенче те йышлă.