ÇУЛСЕРЕНЕХ Карапай Шăмăршă ялĕнче çĕнĕ çуртсем нумай çĕкленеççĕ. Пĕринчен тепри хитре вĕсем. Уйрăмах "Çамрăк çемье" программа йышăннăранпа çурт лартакансен йышĕ ỹсрĕ. Çурт умĕнчи пахчара тĕрлĕ тĕслĕ чечек акса-лартса çитĕнтереççĕ. Т.Степанова, Э.Иванов, Ю.Степанов, А.Столяров, Н.Тимофеев çурчĕсен умĕсем яланах тирпейлĕ те илемлĕ, тĕрлĕ-тĕрлĕ чечексем куçа шартараççĕ. Иртен-çỹренсем вĕсен пахчисем çине ытараймасăр пăхаççĕ. Т.Степановапа Г.Николаеван пахчисене вара районти конкурса та тăратма юрать. "Нивушлĕ çакăн пек илеме çын тума пултарать-ши?" - тетĕн вара чечексем çине куçа илмесĕр пăхнă чух. Çакăн пек тăрăшуллă çынсене курса ыттисем те тĕслĕх илеççĕ. Çитес çул пирĕн ялта чечек тусĕсем тата та ытларах пуласса çирĕп шанатăп.