ШĂМĂРШĂ районĕн пĕтĕм лаптăкĕ 199,1 тăваткал километр шутланать пулсан, 51,3 пин гектарне вăрмансем йышăнаççĕ. Çав шутра çурри _ "Чăваш вăрманĕ" Наци паркĕн территорийĕ. Çак пуянлăха сыхласа упрасси, ỹстерсех пырасси _ вăрманçăсен таса тивĕçĕ. Хăйсене шанса панă ĕçе тăрăшсах пурнăçлаççĕ-ха вĕсем: каснă вăрмансем вырăнне çĕннине лартаççĕ, çамрăк хунавсене пăхса ỹстереççĕ тата ытти те. Вăрманăн чи хăрушă инкекĕ _ пушар тухни. "Пĕр йывăçран пин шăрпăк пĕрчи тума пулать, пĕр шăрпăк пĕрчи пин гектар вăрмана çунтарма пултарать", - теççĕ ешĕл пуянлăх хуçисем. Тĕрĕс калаççĕ. Сỹнтермен шăрпăкпа пирус тĕпĕ, йăсăрланса выртакан кăвайт хăрушă инкек сăлтавĕ пулнине вун-вун тĕслĕхпе çирĕплетме пулать. Акă, часах çут çанталăк чĕрĕлсе илемленĕ, çынсем ушкăнпа е пĕччен-иккĕн вăрмана çул тытĕç. Çут çанталăк ырлăхĕ кашнин валлиех çитет: савăн, сывлăхна тĕреклет, кайăксен илемлĕ юррисене итлесе чун-чĕрỹне килентер. Вăрмана канма кайсан кăвайт чĕртсе шашлăк е шỹрпе пĕçерекенсем те сахал мар. Анчах пурте пĕлетпĕр-и-ха хамăр хыççăн вут-кăвара шывпа сỹнтерсе, тăпрапа хупласа хăвармаллине? Аслисем çакна ăнланаççĕ пулсан, çамрăксене, ачасене каласа ăнлантармалла, хытах асăрхаттармалла. Кăвайта шыв хĕрринче, ятарласа уйăрнă вырăнсенче çеç чĕртме юранине те пурте пĕлме тивĕç. Пирус-сигарета та ятне туса лартнă вырăнта кăна туртма юрать. Тепĕр çивĕч ыйту _ вăрмана тĕрлĕрен ăпăр-тапăрпа варалани. Нивушлĕ хамăр ĕçсе çинĕ хыççăн юлнă пластик е кĕленче савăт-сапана, консерва банкисене хутаçа чиксе çỹп-çап тăкакан вырăна кайса пăрахма çав териех йывăр-ши? Атьăр-ха Шăмăршă урамĕсенче çеç мар, Шăмăршă вăрманĕнче те тирпейлĕ те илемлĕ пултăрччĕ тесе кĕрешỹ пуçарар. Вăрмана кĕнĕ чух çут çанталăка сиен кỹрес тесе мар, усă тăвасчĕ тесе шухăшлар.