ЧĂВАШ Республикинчи Наци библиотеки, республикăра пурăнакансене кĕнекене юратма вĕрентес тата чи лайăх литература произведенийĕсем анлăрах сарас тĕллевпе, кăçалхи февраль-март уйăхĕсенче "Литературăллă Чăваш Ен: çулталăк кĕнеки _ 2005" конкурс ирттересси çинчен пĕлтерет. Конкурс пынă вăхăтра чăвашла пичетленнĕ, вулакансем уйрăмах килĕштерекен кĕнекене, вырăсла е чăвашла пичетленсе тухнă, вулакансем уйрăмах килĕштерекен ача-пăча кĕнекине, конкурса хутшăннă чи лайăх библиотекăна, чи нумай кĕнеке вулакана палăртĕç. Районти библиотекăсенче "Литературăллă Чăваш Ен: çулталăк кĕнеки _ 2005" выставка йĕркеленĕ. Конкурс пынă вăхăтра вулакансен конференцийĕсем, диспутсем, дискуссисем, литература сехечĕсем, кĕнеке презентацийĕсем, поэзи сехечĕсем, викторинăсем ирттерме палăртнă. Çавăн пекех "Г.Айхи. Лăпкăлăх поэзийĕ" электронлă кăларăмăн презентацийĕ те иртĕ.