СĔНТĔРВĂРРИ районĕнчи Хуракассинчи шкулта пысăк трагеди пулнăранпа 45 çул çитнине асăнса Шупашкарта ирттернĕ çамрăк пушарниксен ăмăртăвне Карапай Шăмăршăри вăтам шкулта вĕренекенсем те хутшăнчĕç. Унта, хамăр республикăсăр пуçне, Марий-Эл тата Тутарстан шкулĕсенчи командăсем те вăй виçрĕç. Çак ăмăртура пурĕ 20 команда тупăшрĕ. Вĕсем пĕр-пĕринпе 100 метрлă дистанцие чупассипе, вăрăм пусма тăрăх çуртăн иккĕмĕш хутне хăпарса условнăй "пушара" сỹнтерессипе ăмăртрĕç. Итогсене пĕтĕмлетсен, карапайсен 9 çынран тăракан команди саккăрмĕш вырăн йышăнни палăрчĕ. Хамăр республикăри районсем хушшинче вара пирĕн команда виççĕмĕш вырăн çĕнсе илчĕ. Ăмăртура уйрăмах Александр Сабаев, Алексей Чугунов тата Николай Сидоров палăрчĕç.