ÇАК кунсенче Шупашкарти "Олимпийский" стадионра ЧР Президенчĕн Н.В.Федоровăн парнисене çĕнсе илессишĕн "Спортпа туслă çемье" ятпа республикăри спорт фестивалĕ иртнĕ. Унта хутшăннă ашшĕ-амăшĕсемпе ачисем сывă пурнăç йĕрки кăна этеме ырлăх-сывлăхпа телей кỹнине уççăн çирĕплетнĕ. Хаваслă та шавлă уява республикăн тĕрлĕ тăрăхĕнчен пĕтĕмпе 30 çемье, çав шутра Палтиелĕнчи Сорокинсен çемйи те хутшăннă. Çемье пуçĕ _ Рудислав Петрович, амăшĕ _ Светлана Леонидовна, хĕрĕ _ Марина. Хĕр ачан ашшĕпе амăшĕ ялти шкулта физкультура предметне вĕрентеççĕ. Вун икĕ çула çитичченхи хĕр ỹстерекен çемьесем хушшинче Сорокинсем иккĕмĕш вырăн йышăннă, хаклă парне илме тивĕçнĕ.