Шăмăршăри "Аленушка" ача садĕнче, музыка руководителĕ Валентина Кудряшова тата Наталья Ширшлина воспитатель ертсе пынипе, Тăван çĕршыв хỹтĕлевçисен кунне халалласа КВН вăййи иртрĕ. Аслă ушкăнри арçын ачасем _ вĕсем "Летчиксем" тата "Моряксем" командăсене пайланса ăмăртрĕç _ художество мелĕсемпе усă курса пĕр-пĕрне саламларĕç, çар обмундированине хăвăрт тăхăнас-хывас тĕлĕшпе вăй виçрĕç, строй юррине юрларĕç, салтаксен пурнăçĕпе çыхăннă тĕрлĕ ыйтусене хуравларĕç, тупмалли юмахсене шĕкĕлчерĕç. Музыка тăхтавĕсем вăхăтĕнче хĕр ачасем юрă-такмак шăрантарчĕç. Семен Мульдияровпа Андрей Бакланов вара моряксен ташшипе савăнтарчĕç. Итогсене пĕтĕмлетсен "Моряксем" çĕнтерни палăрчĕ. Вĕсем призсем _ тетте-карапсем илчĕç. "Летчиксем" те парнесемсĕр юлмарĕç, вĕсем тетте-самолетсене тивĕçрĕç.