Иртнĕ вырсарни кун, хоккей сезонĕ уçăлнă май, Шăмăршăри каток çинче малтанхи вăйăсем пулса иртрĕç. Чи малтанах Шăмăршăри тата Чукалти пĕтĕмĕшле вăтам пĕлỹ паракан шкулсен командисем тĕл пулчĕç. Кĕрешỹ 2:1 шутпа, хăнасем çĕнтернипе вĕçленчĕ. Шăмăршăпа Чукал ялĕсен администрацийĕн хушшинчи вăйăра кил хуçисем вăйлăрах пулчĕç, хăнасене 5:3 шутпа парăнтарчĕç. Жюри Федор Лукьянова (Чукал) чи лайăх вратарь, Павел Матвеева (Шăмăршă) чи лайăх хоккеист, Николай Жилкина (Шăмăршă) чи лайăх тапăнса вылякан тесе йышăнчĕ. Вĕсем ятарлă призсене тивĕçрĕç.